Nutaarsiassat


2018 2017 2016 Flere år...

16-01-2018

Lars Godtfredsenimik eqqaaniut

Arfininngornermi ulloq 13. januar 2018 siusinnerusukkut Landsrådimut Inatsisartunullu ilaasortaasimasoq Peter Lars Gerhardt Godtfredsen toqukkut qimaguppoq, 84-inik ukioqarluni.

 

Lars, nunatta Landsrådiinut 1974-imiit ilaasortaaqatigisimasara, eqqaamajuassavara. Taamanikkut Landsrådimut ilaasortanngorpoq Hendrik Nielsen peqatigalugu, Johan Knudsenimut Jørgen Poulsenimullu, 1974-imi helikopterip nakkarnerani ajunaartunut, sinniisussatut. Lars Godtfredsen 1975-imi qinigaaqqippoq, Namminersornerulernerullu eqqunneqarnerata kingorna Inatsisartunut Atassut sinnerlugu qinigaaqqilluni, ilaasortaallunilu 1981-imi nammineq pissuteqarluni tunuarnissami tungaanut.

 

Lars Narsarmiuuvoq, maskinalerisutut ilinniarsimalluni ukiorpassuarnilu nunatsinni sulinermik inuussutissarsiutillit kattuffianni taamanikkut GAS-imik taaguuteqartumi timitalimmik suleqataasimalluni, ukiorpassuarni Narsami immikkoortortami siulittaasutut ukiunilu pingasuni siulersuisuunernut ilaasortatut. Lars ukiorpassuarni Narsami innaallagissiorfimmi sulisimavoq Narsamilu peqatigiiffeqarnermi ilisimaneqarluarluni.

 

Lars piniartorsuusimasup Andreas Godtfredsenip erneraa namminerlu aamma pinerrarissuulluni.

 

Narsami kommunalbestyrelsimut ilaasortaasimavortaaq, piffissallu ilaani borgmesterip tulliatut atuussimalluni.

 

Eqqaaneqarnera ataqqineqartuuli.

 

 
 

Ikinngutinnersumik inuulluaqqusillunga

 

Lars-Emil Johansen