Aaqqissuussaaneq


Inatsisartut allaffissornikkut sullinneqarnerat Inatsisartut Allattoqarfiata isumagisaraa

Matumani ilaalluni Siulittaasoqarfiup sullinneqarnera, Inatsisartut ataatsimiinnerisa piareersarneqarnera aaqqissuussaasumillu ingerlanneqarnissaa, ataatsimiititaliat sullinneqarnerat ulluinnarnilu allaffissornikkut ingerlatsineq. Tamatuma saniatigut saqqummersitsinerit, Inatsisartut Allattoqarfiata takusassarsiorfigineqarnera imaluunniit pilersaarutit annertuut assersuutigalugu Inuusuttut Inatsisartoqarnissaanut piareersarnerit ingerlanneqarnissaallu allattoqarfiup isumagisarpai.

 

Inatsisartut Allattoqarfiat ukuninnga immikkoortortaqarfeqarpoq:

Siulittaasoqarfiup allattoqarfia

Suliniutinut paasissutissiinermut immikkoortortaq

Ataatsimiititaliat allattoqarfiat

Inatsisissanik nalilersuisarfik

Nutserisoqarfik

Sullissivik

Aningaasaqarnermut aqutsisoqarfik

 

Organisationsplan

 

Allaffissornikkut akisussaasuunerpaaq tassaavoq Inatsisartut allattaanerat. 

 

Inatsisartut allattaanerat

Siulittaasoqarfiup naalakkersuinikkut aammalu inatsisartutigoortumik sinniisuutitaasunut tunngatillugu suliniutigisaasa sammisaasalu ataqatigiissaarneqarnissaat Inatsisartut allattaanerata isumagisaraa. Inatsisartut ataatsimiinnissaannut atatillugu Inatsisartut allattaanerata ataatsimiinnermut tamarmut ullunullu ataasiakkaanut ullormut oqaluuserisassat piareersartarpai, soorluttaaq Inatsisartut ataatsimiinnerisa nalaanni Inatsisartut ataatsimiittarfianni allatsitut atuuttartoq.

 

Siulittaasoqarfiup suliassaanut tunngasumik sullissinermini Inatsisartut allattaanerata makku aamma suliassarai:

Naalakkersuisunut attaveqarneq,
Naalagaaffeqatigiinnermut tunngasumik attaveqarneq,
inatsisartutigoortumik sinniissuutitanik tikeraartoqarnerani qaaqqusisuuneq taamatullu sinniisuutitat qaaqqusineranni sinniisutut peqataaneq,
Siulittaasoqarfiup suliniutigisaanut tunngatillugu partiit allattoqarfiinut sammisumik ataqatigiissaarineq,
ilinniagallit kattuffiinut isumaqatiginninniarnerit isumagineri.

Inatsisartut Allattoqarfiata siulersorneqarnerani Inatsisartut Allattaanerat qullersatut akisussaavoq.

 

Siulittaasoqarfiup allatseqarfia

Inatsisartut Siulittaasoqarfiannik sullissinermini Inatsisartut Allattaanerat Siulittaasoqarfimmut allatseqarfimmit allatseqarfiup pisortaanit siulersorneqartumit ikiorteqarpoq. Siulittaasoqarfiup allatseqarfia Inatsisartut Allattaanerannut akisussaaffeqarlunilu taassuma ataaniippoq, taamaalillunilu Inatsisartut  Allattaanerata Siulittaasoqarfimmut sullissinerani suliatigut ikiuuttarluni. Inatsisartut Allattoqarfiata ulluinnarni siulersorneqarneranut allatseqarfiup pisortaa akisussaasuunngilaq, suliassarmi taanna Inatsisartut Allattaanerata isumagisaraa.

 

Allattoqarfiup takorluugai

Pitsaassuseqarluartumik ikiuinissaq sullissinissarlu

Avatangiisinut sukkasuumik eqqortumillu attaveqarneq

Pisortat suliffeqarfiini pissanganarnerpaanissaq ineriartorfiulluarnerpaanissarlu

Aalajangigassani sapinngisamik pitsaanerpaamik tunngavissiinissamut qulakkeerinninneq

login